کورته‌یه‌ک له‌ میژووى سه‌نگه‌سه‌ر

عوسمان سه‌نگه‌سه‌رى:

ناحیه‌ى ناوده‌شت یه‌کێکه‌ له‌ ناحیه‌ هه‌ره‌کۆنه‌کانى قه‌زاى پشده‌ر سه‌ربه‌ پارێزگاى سلێمانى ، له‌ ڕووى هه‌ڵکه‌وته‌ى جوگرافیه‌وه‌ که‌وتۆته‌ به‌شى باکوورى خۆرئاواى پارێزگاى سلێمانى وه‌ زنجیره‌ چیاى قه‌ندیل له‌به‌شى باکوورى خۆرهه‌لاَتى وه‌کو سنورێکى سروشتى نێوان ( عێراق و ئێران ) لێک جیاده‌کاته‌وه‌ ، له‌به‌شى باشورى زىَ ى بچوک ده‌ورى داوه‌و له‌به‌شى خۆرئاواشیه‌وه‌ زنجیره‌ چیاى کێوه‌ڕه‌شه‌ که‌ سنورى پشده‌ر له‌ قه‌زاى ڕانیه‌ جیاده‌کاته‌وه‌ ، ئه‌م ناحیه‌یه‌ له‌ کۆندا له‌ ( ٩٦ ) گوندى ده‌وروبه‌رى پێک هاتووه‌ تا ساڵى / ٢٠٠٠ که‌ ناحیه‌ى ژاراوه‌ دروست بوو ( ٣٣ ) گوندیشى خرایه‌ سه‌ر ناحیه‌ى ژاراوه‌ وه‌ لىَ ى جیابۆوه‌ ، مێژووى ناحیه‌ بوونى ناوده‌شت ده‌گه‌ڕێته‌وه‌ بۆ ساڵى / ١٩٢٦ که‌ فه‌رمانى بوون به‌ ناحیه‌ى بۆ ده‌رچووه‌ و له‌ ساڵى / ١٩٢٨ دا وه‌ک ناحیه‌ى ناوده‌شت بۆ یه‌که‌م جار به‌ڕێوه‌به‌رى ناحیه‌ به‌ فه‌رمى ده‌ست به‌کاربووه‌ که‌ به‌ڕێوه‌به‌رى ناحیه‌که‌ یه‌کێک بووه‌ له‌ به‌گزاده‌کان ، ئه‌م ناحیه‌یه‌ تا ساڵى / ١٩٧٠ سه‌ربه‌ قه‌زاى ڕانیه‌ و ئه‌ویش سه‌ربه‌ لیواى هه‌ولێر بووه‌ ناحیه‌ى ناوده‌شت که‌ مه‌رکه‌زى ناحیه‌ک سه‌نگه‌سه‌ر و گوندو دێهاته‌کانى بنارى قه‌ندیل و بنارى گه‌لاَڵه‌ و ده‌وروبه‌رى ده‌گرێته‌وه‌ ، ناوه‌که‌ى ده‌گه‌ڕێته‌وه‌ بۆ ئه‌و گوندانه‌ى له‌و ده‌شتاییه‌ى بنارى چیاى قه‌ندیل هه‌ڵکه‌وتوون پێیان ووتوه‌ ناوده‌شت ده‌رباره‌ى ناوى سه‌نگه‌سه‌ریش له‌وه‌وه‌ هاتووه‌ که‌ له‌ سه‌روو به‌رزایى سه‌نگه‌سه‌رى کۆن که‌ ئێستاکه‌ شوێنه‌وارو پاشماوه‌ى ماوه‌ کۆمه‌ڵێک به‌ردى خڕ و گه‌وره‌ و به‌ سه‌نگى لىَ بووه‌ ، وه‌ک سه‌ر وابووه‌ و پێیان ووتوه‌ سه‌نگى سه‌ر ، دواتر له‌ ئه‌نجامى به‌کارهێنانى ئه‌م ناوه‌ گۆڕاوه‌ بۆ سه‌نگه‌سه‌ر . وه‌ له‌ دواى ساڵى / ١٩٥٨ له‌ ئه‌نجامى دروست کردنى به‌ربه‌ستى ئاوى دوکان که‌ بووه‌ته‌ هۆى ژێر ئاو که‌وتنى کۆمه‌ڵێک گوندى سنووره‌که‌ و هه‌ره‌وه‌ها گواستنه‌وه‌ى ئه‌و گوند و تیره‌ و عه‌شیره‌تانه‌ بۆ ده‌شتایى ( دوانزه‌ بانوو ) که‌ سه‌نگه‌سه‌رى ئێستایه‌ له‌لایه‌ن حکومه‌تى عبدالکریم قاسمى ئه‌وکاته‌ى عێراق و جىَ به‌جىَ کردنى پڕۆژه‌ى ئاودێرى سه‌نگه‌سه‌ر بۆ به‌راو کردنى ده‌شتایى دوانزه‌ بانوو ، گواستنه‌وه‌ى سه‌نگه‌سه‌رى کۆن و تیره‌و عه‌شیره‌ته‌کانى ( مه‌نگوور ، ئاکۆ ، مه‌رگه‌یى ، میرزاڕۆستمى ، شیلانه‌یى ، کۆمه‌ڵه‌یى ، سندۆڵه‌یى ، هتد ) بۆ سه‌نگه‌سه‌رى تازه‌ ئه‌وه‌ش بووه‌ هۆى فراوان بوونى په‌یوه‌ندى یه‌ کۆمه‌لاَیه‌تیه‌کان و تێکه‌لاَوبوونى پێکهاته‌ جیاجیاکانى کۆمه‌ڵ و دامه‌زراندنى بنچینه‌یه‌کى تازه‌ى پێکه‌وه‌ ژیانى کۆمه‌لاَیه‌تى له‌ سنوره‌که‌دا . سه‌نگه‌سه‌ر له‌ ساڵى / ١٩٥٧ دا له‌لایه‌ن به‌ڵێنده‌رێکى به‌ریتانى به‌ناوى ( میسته‌ر دۆم ) ٢١٢ خانوو بۆ سه‌نگه‌سه‌ر ده‌رچوو ته‌واوى نه‌کردن و به‌ نیوه‌چڵى به‌جىَ ى هێشتن ، دواتر له‌لایه‌ن ( ٣ ) به‌ڵێنده‌رى کورده‌وه‌ به‌ناوه‌کانى ( محمد سعید ، حاجى عبدالله ناسراو به‌ عه‌به‌ى ده‌لاک ، شه‌فیق أحمد ) دواتر ( ٣٠ ) خانووى تر بۆ کۆمه‌ڵه‌ییه‌کان دروست کرا و خه‌ڵکى سه‌نگه‌سه‌ریش له‌ ڕێگاى ( ٥ ) حه‌وزى کۆنکریتى بۆ ئاو خه‌زن کردن که‌ سه‌رچاوه‌که‌ى له‌ شه‌هیدانه‌وه‌ هاتبوو خه‌ڵکه‌که‌ ئاوه‌که‌ى به‌کاردێناو وه‌ دروست کردنى کۆنکریت به‌ درێژایى ( ١٢ ) کم و جۆگا له‌لایه‌ن ئه‌ندازیارێکى کورده‌وه‌ سه‌رپه‌رشتى ده‌کرا به‌ ناوى ( صالح به‌گ )

 

ڕووبه‌روو دانیشتوان:

ناحیه‌ى سه‌نگه‌سه‌ر پێش ئه‌وه‌ى ناحیه‌ى ژاراوه‌ى له‌ ساڵى / ٢٠٠٠ لىَ جیابێته‌وه‌ ڕووبه‌ره‌که‌ى ( ٧٨٦ ) کم٢ به‌لاَم ئێستا بۆته‌ ( ٦٠٨ ) کم٢ ژماره‌ى دانیشتوانى ساڵى / ١٩٨٩ ( ٧٠٠ ) ماڵ بووه‌ ئێستا زیاتر له‌ ( ٤٣٨٠ ) ماڵه‌ و به‌ گوێره‌ى سه‌رژمێرى ساڵى ١٩٥٧ ( ٩٠٣١ ) که‌س بووه‌ به‌لاَم ئه‌و ژماره‌یه‌ هه‌ڵکشاوه‌ بۆ ( ٢١٦٥٤ ) که‌س له‌ ساڵى / ٢٠٠٥ دا له‌حاڵى حازر دانیشتوانه‌که‌ى ( ٢٧٠٠٠ ) که‌سه‌.

 

پانۆڕاماى سیاسى ناحیه‌ى سه‌نگه‌سه‌ر:

به‌هۆى پێگه‌ى جوگرافى و سیاسى شاره‌که‌ له‌ مێژوودا که‌ هه‌رده‌م لانه‌ى شۆڕش و به‌رخودان بووه‌ له‌ هه‌ردوو شۆڕشى کۆن و نوىَ دا ئه‌و کاره‌سات و نه‌هامه‌تى یانه‌ى لاى خواره‌وه‌ى به‌سه‌ر هاتووه‌ :

• بۆیه‌که‌م جار له‌ساڵى / ١٩٦٥ به‌هۆى ڕژێمى ئه‌و کاته‌ى عێراقه‌وه‌ به‌شێکى شاره‌که‌ سوتاو وێران بووه‌ و خه‌ڵکه‌که‌شى ئاواره‌ بووه‌ .

• له‌ ٢٥ / ٩ / ١٩٦٨ له‌ شه‌ڕێکى بىَ وێنه‌دا گه‌وره‌ترین داستانى شۆڕشى لىَ تۆمار کراوه‌ و زیاتر له‌ ( ١١ ) سه‌یاره‌ى ڕژێم سوتێنراوه‌ .

• حکومه‌تى ئه‌وساى عێراق له‌ تۆڵه‌ى ئه‌و داستانه‌ى ساڵى / ١٩٦٨ له‌ ١٤ / ٥ / ١٩٦٩ سه‌نگه‌سه‌ر به‌ ته‌واوى له‌ سه‌ر ده‌ستى ملازم داود که‌ قیاده‌ى سوپاى عێراقى کردووه‌ سووتاوه‌ و وێران کراوه‌ .

• له‌ ساڵى / ١٩٧٤ به‌ خه‌ستى تۆپباران کراوه‌ خه‌ڵکه‌که‌ى بۆ چه‌ند جار ئاواره‌ بووه‌ و به‌رده‌وام له‌و ماوه‌یه‌دا له‌ژێر مه‌ترسى بۆمبارانى فڕۆکه‌و تۆپباران دا بووه‌ ، ژیانى له‌ ناو ئه‌شکه‌وته‌کانى ده‌وروبه‌رى دا به‌سه‌ر بردووه‌ .

• له‌ ساڵى / ١٩٨٣ هاوده‌نگ و هاوهه‌ڵوێست له‌گه‌ڵ باقى ڕاپه‌ڕینى شاروشارۆچکه‌کانى دیکه‌ى کوردستان ئه‌ویش ڕاپه‌ڕیوه‌ و خه‌ڵکانێکى بریندار و شه‌هید و ڕاپێچى زیندانه‌کانى کراوه‌ .

• له‌ ساڵى / ١٩٨٨ دا کاتێک ئۆردوگاى ( به‌سته‌ستێن ) ڕاگوێزران بۆ ئۆردوگاى زۆره‌ملىَ ى حاجیاوا ، ئه‌وه‌ش بووه‌ هۆى ئه‌وه‌ى خه‌ڵکى ناو سه‌نگه‌سه‌ر جارێکى تر ئاواره‌ى ئێران بێت .

• له‌ ٩ / ٦ / ١٩٨٩ به‌ یه‌کجارى ڕاگوێزراوه‌ و شاره‌که‌ى له‌گه‌ڵ زه‌وى ته‌خت کراوه‌ و ئه‌و خه‌ڵکه‌ى که‌ مابۆوه‌ ڕاپێچى ئۆردوگا زۆره‌ملىَ کانى ( حاجیاوا ، بازیان ، خه‌بات ، که‌ورگۆسک ، داره‌توو ، تۆبزاوا ، جدیده‌ ، هتد ) کراوه‌ .

• له‌ ٤ / ٣ / ١٩٩١ له‌یه‌که‌م چه‌خماخه‌ى ڕاپه‌ڕین له‌ خه‌بات له‌گه‌ڵ خه‌ڵکى قه‌لاَدزىَ به‌یه‌که‌وه‌ وه‌ک پشده‌ر ڕاپه‌ڕین و دواتر له‌ ٥ / ٣ / ١٩٩١ له‌ ته‌قینه‌وه‌ى ڕاپه‌ڕین دا له‌ ڕانیه‌ شه‌هید ( محمد أحمد ئاڵــى ) وه‌ک یه‌کێک له‌ شه‌هیده‌کانى ڕاپه‌ڕین که‌ خه‌ڵکى سه‌نگه‌سه‌ره‌ له‌ ده‌ست به‌سه‌ردا گرتنى مونه‌زه‌مه‌ى ڕانیه‌دا له‌به‌رده‌م مونه‌زه‌مه‌ دا شه‌هید بوو .

• دواى په‌یماننامه‌ى ساڵى / ١٩٧٥ ى شوم که‌ سیاسه‌تى سوتماک کردن هاته‌ ئاراوه‌ حکومه‌تى عێراق ته‌واوى گونده‌کانى سه‌ر سنورى ناحیه‌ى سه‌نگه‌سه‌رى ڕاگواست بۆ چه‌ند ئۆردوگایه‌کى زۆره‌ ملىَ له‌ ده‌وروبه‌رى ناحیه‌ى سه‌نگه‌سه‌ر به‌ ناوى ( کۆمتان ، به‌سته‌ستێن ، توه‌سوران ، بایه‌وان ) که‌ له‌ساڵى / ١٩٧٧ به‌ دواوه‌ په‌یڕه‌و کرا ، به‌لاَم له‌ دوایدا جارێکى تر ئه‌وانه‌ى ناوبراون و خودى ناحیه‌که‌ش له‌ ساڵى / ١٩٨٨ و ١٩٨٩ به‌ یه‌کجارى ڕاگوێزران وێران کردن و چۆڵ کردنى یه‌کجارى ئه‌و ناوچه‌ی گه‌وره‌ترین کاره‌سات و نه‌هامه‌تى به‌ سه‌ر خه‌ڵکه‌که‌یدا هێناو پێکهاته‌ى کۆمه‌لاَیه‌تى ئه‌و ناحیه‌یه‌ى گۆڕى .

سه‌نگه‌سه‌ر له‌پیگه‌ى شۆرشدا:

سنورى ناحیه‌ى سه‌نگه‌سه‌ر سه‌ره‌راى سىَ جار رووخاوه‌و سوتاوه‌و ٦٨ کادیرو فه‌رمانده‌ى سیاسى و عه‌سکه‌رى و پیشمه‌رگه‌ى له‌شاخ شه‌هیدبوه‌و به‌سه‌دان پیشمه‌رگه‌شى هه‌بوه‌ له‌شاخ و دواى راپه‌رینیش ٧٠ شه‌هیدى هه‌یه‌ هه‌میشه‌ لانه‌ى شۆرش بوه‌ و سه‌رۆکى هه‌ریمیش به‌ وته‌ى خۆى له‌ سه‌نگه‌سه‌ر چه‌کى کردۆته‌ شان و شۆرشى نویش هه‌ر له‌و ده‌ڤه‌ره‌و قه‌ندیل سه‌رى هه‌لدا به‌لام به‌داخه‌وه‌ ئه‌م شاره‌ له‌که‌لاوه‌ ده‌چىَ و زۆر که‌مى بۆ کراوه‌و ئومید ده‌که‌م ئاوریک له‌ئاوه‌دان کردنه‌وه‌ى بدریته‌وه‌ و بوارى کشتوکالى ببوژێنه‌وه‌و ده‌رویه‌کى لىَ بکرێته‌وه‌ .

 

سه‌نگه‌سه‌ر و لایه‌نى ئابوورى و کشتوکا ل:

بڕبڕه‌ى پشتى داهات و بژێوى خه‌ڵکى ناوچه‌که‌ کشتوکاڵ و ئاژه‌ڵدارى یه‌ کشتوکاڵه‌که‌ش به‌ هۆى ئه‌و پڕۆژه‌ ئاودێرى یه‌ى که‌ دووه‌م پڕۆژه‌یه‌ له‌ عێراقدا و وه‌ یه‌که‌م پڕۆژه‌شه‌ له‌ پارێزگاى سلێمانى که‌ ( ٠٠٠ ١٠ ) ده‌هه‌زاردۆنم زه‌وى به‌راو ده‌کات له‌ سه‌رده‌مى ڕژێمدا گه‌وره‌ترین سه‌رچاوه‌ى داهاتى کشتوکاڵى بووه‌ وه‌ باشترین ناوچه‌ى به‌رهه‌م هێنانى تووتن هه‌ژمار کراوه‌ له‌ سه‌رتاسه‌رى عێڕاقدا ، به‌لاَم به‌ داخه‌وه‌ ئێستا به‌هۆى که‌م ته‌رخه‌مى و نه‌بونى پلانى گونجاو له‌و بواره‌دا بۆته‌ هۆى ئه‌وه‌ى که‌ زه‌وى یه‌کان ئاوڕیان لىَ نه‌درێته‌وه‌ وه‌کوو پێویست سوودى لىَ نه‌بینرێت بۆ کشتوکاڵ .

 

لایه‌نى کۆمه‌لاَیه‌تى ناحیه‌که‌:

به‌هۆى پشتگوىَ خستن و ئاور لىَ نه‌دانه‌وه‌ى وه‌کوو پێویست له‌ ئاوه‌دانکردنه‌وه‌ و خزمه‌تگوزارى له‌ ناحیه‌که‌ و ده‌وروبه‌رى ده‌بینین ، زۆر له‌ بنه‌ماڵه‌ دیاره‌کانى ناحیه‌که‌ نه‌گه‌ڕاونه‌ته‌وه‌ ناحیه‌که‌ به‌ڵکو له‌ شاره‌کانى دیکه‌ نیشته‌جىَ بوون وه‌هه‌روه‌ها بێزارى و نائومێدى بۆته‌ هۆى کۆچى گه‌نجانى ئه‌م شارۆچکه‌یه‌ به‌ره‌و هه‌نده‌ران و بىَ کارى له‌ ناو ئاپۆڕه‌ى خه‌ڵکدا دروست بووه‌ سه‌رباره‌ى ئه‌وه‌ زه‌وى و خانوه‌کانیشمان تاپۆ نه‌کراوه‌ که‌ له‌ ساڵى / ١٩٥٧ ه‌وه‌ ئه‌م زه‌وى یانه‌ نیشته‌جێن و به‌کاریان ده‌هێنین و له‌ گه‌ل خانوه‌کانیان

 

لایه‌نى هونه‌رى و ڕۆشنبیرى و وه‌رزشى:

له‌ بوارى هونه‌رى و ڕۆشنبیرى و وه‌رزشى .. هتد هه‌ر له‌ کۆن و ئێستادا به‌رده‌وام کۆمه‌ڵێک خه‌ڵک دانه‌بڕاوبووه‌ لىَ ى و چه‌ندین گروپى هونه‌رى و شانۆیى و وه‌رزشى له‌م شاره‌دا بره‌وى هه‌بووه‌ و جىَ ى ده‌ستیان دیار بووه‌ .

 

ده‌رباره‌ى گه‌شت و گوزار و شوێنه‌وار:

ناحیه‌ى سه‌نگه‌سه‌ر ناوچه‌یه‌کى سروشت جوان و ڕازاوه‌یه‌ و چه‌ندین شوێنى وا به‌دى ده‌کرێت که‌ بۆ بوارى گه‌شت و گوزار ده‌بێته‌ جێگاى تێڕامانى گه‌شتیارانى ناوخۆ و ده‌ره‌وه‌ى کوردستان وه‌ ده‌بێته‌ داهاتێکى باش بۆ حکومه‌تى هه‌رێمى کوردستان ، بۆیه‌ پێویسته‌ ئاوڕێکى جددى له‌و باره‌یه‌وه‌ لىَ بدرێته‌وه‌ ، بۆ نمونه‌ ( سوره‌دىَ ، گۆڕ کیسوىَ ، کونه‌ماسى ، دۆڵى سێوه‌یس و بنارى چیاى گه‌لاَڵه‌ ، دۆڵى شه‌هیدان ) وه‌ هه‌روه‌ها له‌ ڕوانگه‌ى شوێنه‌واریشه‌وه‌ چه‌ندین شوێنه‌وارى زۆر دێرینى لىَ به‌دى ده‌کرێت وه‌کوو ( قه‌لاَتى شه‌هیدان ، ماخۆبزنان که‌ مالیکى ئه‌ژده‌رى لىَ ژیاوه‌ ، سه‌نگه‌سه‌رى کۆن ، ده‌شتێوان ) که‌ گه‌وره‌ترین به‌ڵگه‌ گورستانى ده‌شتێوانه‌ که‌ مێژوه‌که‌ى ده‌گه‌ڕێته‌وه‌ زیاتر بۆ ( ٢٠٠٠ ) دوو هه‌زار ساڵ له‌مه‌وبه‌ر .

 

سامانه‌ سروشتى و کانزاییه‌کانى ناحیه‌که‌:

سنورى ناحیه‌ى سه‌نگه‌سه‌ر ده‌وڵمه‌نده‌ به‌ ( نه‌وت ، مس ، به‌ردى خه‌ڵوزى ، به‌ردى گرانیت ، ئاسن ) له‌ بنارى قه‌ندیل وه‌کوو که‌ره‌سه‌یه‌کى خاو هه‌یه‌ ، پێویستى به‌ ئاوڕلىَ دانه‌وه‌ هه‌یه‌ له‌لایه‌ن حکومه‌ته‌وه‌ سه‌نگه‌سه‌ر له‌ چیه‌وه‌ هاتوه‌ )

دوو بۆچونى جیاواز هه‌یه‌ یه‌کیکیان ده‌لىَ له‌کۆندا سه‌نگه‌سه‌ر به‌ردێکى لىَ بوه‌ وه‌کو سه‌نگى سه‌روابوه‌ واته‌ به‌رده‌که‌ له‌شێوه‌ى به‌ردێکى وه‌کو سه‌ر وابوه‌ و ئه‌وى تریشیان ده‌ڵىَ له‌ سه‌رده‌مى کۆندا سه‌نگه‌سه‌ر جێگاى ململانىَ و شه‌ر بوه‌ بیه‌ هه‌میشه‌ سه‌نگه‌رى شه‌ر کردنى به‌ چوار ده‌ورى خۆیدا لىَ داوه‌ بۆ به‌رگرى کردن

 

سه‌رنج و پێشنیار:

١. ئه‌گه‌ر مێژوو ناحه‌قى نه‌کات له‌ ناحیه‌ى سه‌نگه‌سه‌ر ده‌بوایه‌ ئێستا قه‌زا بێت له‌به‌ر ئه‌وه‌ى کۆنترین ناحیه‌یه‌ له‌ کوردستان و عیراقدا که‌ مێژووه‌که‌ى ده‌گه‌ڕێته‌وه‌ بۆ ساڵى / ١٩٢٦ وه‌ بۆ گه‌شه‌ کردن و بوژاندنه‌وه‌ و خزمه‌تگوزارى پێشنیار ده‌که‌ین ئاوڕێک له‌ بوونى به‌ قه‌زاى بدرێته‌وه‌ ، بۆ ئه‌وه‌ى بتوانرێت به‌ هاوکارى هه‌ردوو قه‌زا خزمه‌تى زیاتر به‌ تێکڕاى ده‌ڤه‌رى پشده‌ر بدرێته‌وه‌ .

٢. دوو ڕا و بۆچوون له‌ سه‌ر دۆڵى شه‌هیدان هه‌یه‌ و یه‌که‌میان مێژووه‌که‌ى ده‌گه‌ڕێته‌وه‌ بۆ هاتنى له‌شکرى ئیسلام بۆ کوردستان و زۆر له‌ موسوڵمانه‌کان له‌و دۆڵه‌دا شه‌هید بوون و بۆیه‌ ناوى لێنراوه‌ دۆڵى شه‌هیدان و به‌و ناوه‌ ناسراوه‌ ، دووه‌میان دۆڵى شه‌هیدان ناوچه‌یه‌کى شاخاوى و دڵگیرو جوان بووه‌ جێگاى عه‌شق و شه‌یدایان بووه‌ و دواتریش ناوه‌که‌ى گوڕاوه‌ بۆ دۆڵى شه‌هیدان .

٣. ده‌توانرىَ له‌سه‌ده‌ى دۆلى شه‌هیدان سه‌دیکى بچوک بکرىَ که‌بکریته‌ هۆى ئاو کۆکردنه‌وه‌و سه‌رچاوه‌یه‌کى کاره‌باش بۆ هه‌موو پشده‌ر و هه‌لکه‌وته‌ى شوێنه‌که‌شى ستراتیژییه‌و ئاوه‌که‌شى سه‌رچاوه‌که‌ى ناوخۆى قه‌ندیله‌

٤. ناحیه‌ى سه‌نگه‌سه‌ر سه‌ره‌تا له‌ ٩٦ گوند پیکهاتبو به‌لام به‌هۆى جیابونه‌وه‌ىناحیه‌ى ژاراوه‌ ئیستا ٦٥ گونده‌و بروانه‌ خشته‌و پاشکۆى ژماره‌و ناوى گونده‌کان.

 

 

(( په‌ڕه‌ی شار ))

له‌ چاوه‌ی کامێڕاوه