بانگ

دەولەتا ترک دیسا ھار و ھێج بوویە. کوشت و کوشتدارییا خوە ب تایبەتی ڤان

دەمێن داوییێ راکرییە دەرەجەیا ھەری بلند. ئێرشکارییەکە بێتخووب دکە ل

سەر بزاڤا نەتەوەیییا کورد و کوردستانێ. ب ناڤێ دەولەتا ترک ھوکوومەتا

ئاکپێ د ڤان مەھێن داوییێ دا بێدادییەکە ھند مەزن ئینایە سەرێ کورد و

کوردستانییان کو قابلی قەبوول نینە. ژ جەپھەیێ سڤیل بگرن ھەتا ملێ

لەشکەری زەپتوورەپتەکە دژوار پێکتینن. ژ پۆلیتیکەرێن کورد، ئاکتیڤیستێن مافێن

مرۆڤ ھەتا پارێزەر، نڤیسکار و رۆژنامەڤانان ب ھەزاران کورد و کوردستانی

ھاتنە گرتن. د چار مەھێن داوییێیێن سالا ٢٠١١ان دا ب بۆمباردومانا

ھەوایی، گەریڵا ئانژی سڤیل ب سەدان کورد ھاتن کوشتن. د تۆپبارانا رەشاھی

و بۆمباردومانا ھەوایی دا گەلەک بێپەروا چەکێن کیمیایی تێنە ب کار ئینان. د

گەلییێ تیارێ دا گەریڵا ب ڤان چەکێن کیمیایی ھاتن کوشتن. ھەری داوییێ ژی

کۆمەکە مەزنیا کوردان، ٣٥ کورد ل دۆرا گوندێ رۆبۆسکێیێ سەر ب قلابانێ،

ھاتن قەتل کرن کو پرانییا وان جوانێن تەر و تازە بوون.

 

دەولەتا ترک د ڤێ کۆنسەپتا فەتساندنا بزاڤا نەتەوەیییا کوردستانێ و

خەلکە کورد دا دەستەک و ھەڤکارییەکە مەزن ژ تفاقدارێن خوەیێن ناتۆ و

رۆژاڤایی وەردگرە کو ئەڤە ژ ئالییێ کورد و کوردستانییان ڤە جھێ خەمەکە

گرانە. د سەری دا ئامەریکا [ئوسا]، ئیسرایل و ھندەک دەولەتێن یێکتییا

ئەورووپایێ [یە] ژ چەکێن سڤک و گران، فرۆکەیێن بێ مرۆڤ ھەتا ھەڤکارییا

دیپلۆماتیک، پشتەڤانییەکە ئەجێب مەزن ددنە دەولەتا ترک. ب تایبەتی د

بۆمباردومانێن ھەوایی دا تەکنۆلۆژییا ئامەریکایێ تێتە ب کار ئینان. ئامەریکا

فرۆکەیێن بێ مرۆڤ دانە دەولەتا ترک و ئەڤ فرۆکە ل ئەسمانێ کوردستانێ

دچەرخن و ئاگاھییێن ئستخباری ددنە مەرکەزێن ئەرتێشا ترک و ب ڤان

ئاگاھییان ڤە ناڤچەیێن کو بزاڤا نەتەوەیی لێ خورت تێنە بۆمباردومان کرن.

قەتلیاما ٢٨ێ کانوونێیا ٢٠١١انیا رۆبۆسکێ ژی ب ئاگاھییێن پرەداتۆران ھاتە

کرن. پرەداتۆران کۆما کوردان تەسبیت کر و ئەڤ ئاگاھییە دا ئەرتێشا ترک و

ف-١٦یێن ئەرتێشا ترک ژی گوندییێن کورد دانە بەر بۆمبەیێن ژەھراوی. ئەنجام ٣٥

مرۆڤ ھاتن قەتل کرن.

 

دەولەتا ترک نھا ژی دخوازە سیلەھ و تەکنۆلۆژییا بلندتر ژ ئامەریکایێ

بستینە کو زێدەتر کوردان بکوژە. پرەداتۆر ئستخباراتێ ددن و پشتی دو

سێتان ف-١٦ دەست ب بۆمباردومانێ دکن کو دەولەتا ترک ڤی دەمی گەلەک درێژ

دبینە!. لەوما نھا دخواز فرۆکەیێن بێ مرۆڤ (پرەداتۆر)یێن کو ھەم

مرۆڤان کڤش دکن و د جھ دا ژی بۆمبەیێن بارکری بەرددنە سەر ھەدەفا

خوە، ژ ئامەریکایێ بکرە. ئانکو تەسبیتکرن و لێدان دەملدەست دبە. ئەڤە تێتە

مانایا د دەمەکی گەلەک کورت دا زێدە مرۆڤ کوشتنێ. دەولەتا ترک ژ

پەرفۆرمانسا فرۆکەیێن بێ مرۆڤیێن دەستێ خو دە نە رازییە و دخوازە پرەداتۆرێن

ب چەک بکرە کو د سانییەکێ دا سەدان کوردان ب بۆمبەیان بکوژە!.

 

بۆ دەولەتا ترک ئەڤ کر و کریارا نەمرۆڤی تەبیییە. لێ ئامەریکا دخواز؟ د

کوشتنا کوردان دا چ فایدەیێ گەلێ ئامەریکا ھەیە؟ ھوکوومەتا ئامەریکا دڤێت ڤێ

موھاسەبەیێ دگەل خوە بک. ھەکە دخوازن ل ڤێ ناڤچەیێ تەناھی ھەبە کو

بەرژەوەندییێن خوە بپارێزن، ئەڤە ب کوشتنا کوردان نە مومکونە. پاراستنا

بەرژەوەندییان ب دەستەکدایینا ڤان دەولەتێن ئانتی دەمۆکراتیک نابە.

بەرژەوەندییێن ئامەریکایێ و یەیێ ل ڤێ ناڤچەیێ ب قەدەرا کوردان ڤە گرێدایی

یە. ھەکە ئەڤ دەولەت دخوازن نۆرمێن دەمۆکراتیک ل ناڤچەیێ سەردەست بن دڤێت

تەرەفێ کوردان بگرن نەکو پشتەڤانییا دەولەتا ترک بکن. *دەستەکدایینا

ئۆپەراسیۆنێن ژەنۆسیدالیێن دەولەتا ترک سووجەکی مەزنیێ مرۆڤاھییێیە. د

سەری دا ئامەریکا و ھەڤکارێن وێ دڤێت ڤێ یێکێ بزانن. کورد و کوردستانی ژ

ڤێ دەستەکدایینا وانیا دگەل دەولەتا ترک گەلەکی ئاجزن و گەلەک ب ھەق، ڤێ

نەرازیبوونا خوە ئاشکەرا دکن. ھەڤکاری و دەستەکدایینا دەولەتا ترک زێدەتر

خووونە، زێدەتر کوشتنە، زێدەتر قەتلیامە، زێدەتر ژەنۆسیدە. کورد و

کوردستانی بانگ ل ئامەریکا دکن کو داوییێ ل ڤێ پۆلیتیکا خوەیا

دەستەکدارییا ب دەولەتا ترک را بین.

 

لی سەر ڤێ یەکێ، ژ بۆ پرۆتەستۆکرنا ڤێ پۆلتیکا ئامەریکا، ژ بۆ کو ئامەریکا

دەڤ ژ ڤێ پۆلیتیکایا خوەیا دەستەکدایینا دەولەتا ترتک بەرد، کامپانیا کو

ژ ئالێ کۆنفەدەراسیۆنا کۆمەلەیێن کورد ل ئەورۆپا - کۆن-کوردێ ڤە، د

٠٣.٠١.٢٠١٢ ئان دە ھات دەسپێکرن، ئەم وەک کۆنرەیا نەتەوەیییا کوردستان-کنک

پشتگرییێ ددنێ و دەستەک دکن. *

 

کنک بانگ ل ھەمی کورد و کوردستانییان، ل ھەمی پارتی و سازییێن

کوردستانییان دکە کو نە تەنێ ل ئەورۆپا ل ھەر چار پارچێن کوردستانێ، ل

مەترۆپۆلان، ل وەلاتێن سۆڤیەتا بەرێ، لی رۆژھلاتاناڤین و ل ھەر دەرێ کورد و

کوردستانی لێ ھەیین، ھەمی تەڤلی ڤێ کامپانیایێ ببن و د ڤی واریدە ئاکتیفبن.

 

کنک ب تایبەتی بانگ ل رێڤەبرییا ئیداری و پۆلیتیکیا کوردستانا فەدەرال

دکە، تێکلییێن خوەیێن ب ئامەریکا را ئاکتیڤتر بکن و داخوازێ ژ وان بکن

کو چەکان، تەکنۆلۆژییا لەشکەری و فرۆکەیێن ئستخباری نەدنە دەولەتا ترک.

 

کنک داخوازێ ژ ئامەریکا،یە و ئونێ دکە کو فشارێ ببنە سەر دەولەتا ترک کو

پرسا کورد و کوردستانێ ب رێیێن دەمۆکراتیک بێتە چارەسەر کرن. کنک ژ بۆ

ھەولدانێن ب ڤی رەنگی ئامادەیە کو ھەڤکارییا تەرەفان و ناڤبەینکاران بکە.

 

کنک ھێڤیدارە کو د سەری دا ئامەریکا، ئیسرایل،یە و ئون و ھەموو دەم و دەزگەھێن

ناڤنەتەوەیی بەرامبەری کریارێن نەمرۆڤییێن دەولەتا ترک بێدەنگ نەمینن،

دەستەکێ نەدنێ. ھەر دەستەک و ھەڤکارییا دگەل دەولەتا ترک رژاندنا خووونا

کورد و کوردستانییانە. ڤێ نەکن! ڤێ نەکن! ڤێ نەکن!

 

کۆنسەیا رێڤەبریا کنکێ

 

٠٧. ٠١. ٢٠١٢، بروکسەل

 

 

له‌ چاوه‌ی کامێڕاوه