کۆمبوونا گشتی جڤاتا ١١یا کنکێ ل پایتەختێ بەلچیک بروکسەلێ پێکھات

 

داخویانییا کۆمبوونا گشتی [جڤاتا ١١.]یا کنکێ،

٢٨-٢٩ گولان [مای] ٢٠١١، بروکسەل

 

کۆمبوونا گشتی [جڤاتا ١١.]یا کنکێ د ٢٨ - ٢٩ێ گولانێ دا ل پایتەختێ بەلچیک بروکسەلێ پێکھات.

کۆمبوونا گشتی دو رۆژا ب رۆژەڤەکە تێر و تژی ھاتە کرن و ب سەرکەڤتنی خلاس بوو.

ژ سەرانسەرێ کوردستانێ و دیاسپۆرایا ھەری فرەھ ئەندام، ئەندامێن چاڤدێر و مێھڤان بەشدار بوون.

راپۆرا خەباتێیا کۆنسەیا رێڤەبر ئامادە کری ژ تەرەف جڤاتا ١١. ڤە ھاتە قەبوول کرن و ژ بۆ پەریۆدا نوویا کنکێ پلانێن نوو ھاتن ئامادە کرن.

 

ئاخڤتن و مەساژێن پشتگرییێ:

پکک، کجک، پیک، پدک-باکور، پدک [کدپ]، ینک، پژاک، پچدک، پید، پلاتفۆرما رێخستنێن ھەڤبێشیا سوورییەیێ، پارتییا کۆموونیست [شووی]یا کوردستانێ، پارتییا زەھمەتکێشێن کوردستانێ، یندک، پارتییا زەھمەتکێشێن کوردستانێ-سەربخوە، یێکگرتییا ئسلامییا کوردستانێ، پارتییا کەسکیا کوردستانێ، پارتییا سۆسیالیست و دەمۆکراتێن کوردستانێ-باشوور، بزۆتنەوەیا دامۆکراسیخوازێن کوردستان، کۆنگرەیا گەل، بزۆتنەوەیا دەمۆکراتیا یارەسان، چاک، یێکتییا پارلەمەنتەرێن کوردستانێ، ب سەرۆک، نوونەر و مەساژێن خوە ڤە دەستەک دانە جڤاتا ١١.یا کنکێ و ھەروەھا دیتنێن خوەیێن د دەربارەیێ یێکتییا نەتەوەیی دا ب ئەندامێن جڤاتا ١١. را پارڤە کرن. سەرۆکێ دامێزرێنەر و یێکەمینیێ کنکێ ئسمەت شەریف وانلی ژ بەر رەوشا ساخییا خوە نکاری بەشدار بە لێ مەساژەک رێکرە کۆمبوونا گشتی جڤاتا ١١.یا کنکێ و پشتەڤانییا خوە ب گەرمی دیار کر.

ھەروەھا چەند شەخسییەتێن ناڤداریێن بیانی، ئاوووکات و ئاکتیڤستێ مافێن مرۆڤ باڕی فشەر، پارلەمەنتەرێن بەلچکی-فلامانی مولمەستەر ئنگەبورگ و جارل ڤان لۆووە ژی بەشدار بوون و ب ئاخڤتنێن خوە پشتەڤانییا خوە دگەل کورد و کوردستانییان دیار کرن.

د جڤاتا ١١. دا ھەژمارا ئەندامێن ھێزی و کەسییا کنکێ زێدە بوو. ژ پارتی، رێخستنێن جوانا، ھەرەکەتا ژنا و رێخستنێن سڤیل و دەمۆکراتیک و ھومانیتەر، ئنستیتویێن کوردی و ھەرەکەتێن دینی و باوەرییێن جودا، رۆناکبیر و شەخسییەتێن سەربخوە ئامادە بوون. ب ڤێ کۆمبوونا گشتی جڤاتا ١١. ڤە ھەژمارا ئەندامێن کنکێ بوو ١٨٠ کەس.

د جڤاتا ١١. دا ل پەیمان و پەیرەڤێ گوھۆرینێن گرنگ ھاتن کرن و کنک ب پەرسپەکتیڤ و پرۆژەیێن نوو ژ ئالییێ رێخستنی ڤە ھاتە خورتتر کرن.

د جڤاتا ١١. دا ھلبژارتنێن سەرۆک، کۆنسەیا رێڤەبر و کۆمیتەیا ھوقووقا ناڤخوەیی ژی ھاتن کرن.

ل گۆرەیی ڤێ ھلبژارتنا دەمۆکراتیک ئەڤ ناڤێن ل ژێر ژ بۆ سەرۆکی، کۆنسەیا رێڤەبر و کۆمیتەیا ھوقووقا ناڤخوەیی ھاتن ھلبژارتن:

 

سەرۆک:

تاھر کەمالیزادە

 

کۆنسەیا رێڤەبر:

زوبەیر ئایدار

ئادەم ئوزون

رۆژان ھازم

نیلووفەر کۆچ

نزامەتتن تۆگوچ

گەۆرگە ئاریۆ

ھەڤی بەرواری

بەنگی ھاجۆ

مەریەم موەززن

مەجید ھەسۆ

سۆنگول کارابولوت

مرھەم یگت

مەدەنی فەرھۆ

بابان سەقزی

کۆمیتەیا ھوقووقا ناڤخوەیی

ناسر رەسوولی

گەلاوێژ قادری

ماشاڵاھ ئۆزتورک

ھەج سولەیمان

رۆدی مەلەک

ئەھمەد کاراموس

جەرجور جەمیل

د جڤاتا ١١. دا ل سەر رێخستنیکرنا ھێز و کەسێن نەتەوەیی، فرەھکرنا تەرکیب و بلندکرنا تەمسیلییەتا کنکێ، چێکرنا کۆنفەرانسا یێکتییا نەتەوەیی و ھەروەھا ل سەر رەوشا ب گشتییا کوردستانێ، رۆژھلاتاناڤین و جیھانێ ھاتە راوەستان.

 

د جڤاتا ١١. دا ئەڤ تەسبیت ھاتن کرن:

ئ. جیھانا رۆژاڤایێ گراناھییا خوەیا ئابۆری، پۆلیتیک، سۆسیال و کولتوری ددۆمینە. د ناڤ ڤێ بلۆکێ دا ئامەریکا رۆلا سەرەکە ب گرانی د دەستێ خوە دا دگرە. یێکتییا ئەورووپایێ [یە] ھەرچەند دگەل ئامەریکایێ تەناکوز ھەبن ژی د چارچۆڤەیا پرسگرێکێن جیھانێ دا تفاقدارییا خوەیا دگەل ئامەریکایێ رادگرە. پرۆزیکێن د ناڤبەینا دەولەتێن یەیێ دا چو جارا نابنە ئاستەنگ و گرێبەند د ناڤبەینا وان ب خوە دا. بلۆکا رۆژاڤایێ ب گشتی د مژارێن ستراتەژیکیێن جیھانێ دا ب ھەڤ را ھەرەکەت دکن و تفاقدارن. ڤێ ھەڤراتییا خوە د وارێ چارەسەرکرنا پرسگرێکێن ل ناڤچەیێن جودایێن دنیایێ دا ژی نیشان ددن. ب تایبەتی ب رێیا دەزگەھێ لەشکەری ناتۆیێ دابەرزینا خوەیا ل ھەر دەرێ کو مەنفێتێن وان لێ ھەنە دکن. جیھانا رۆژاڤایێ ئیرۆ ب ھێزا ناتۆیێ ژ ئاسیایا ناڤین ھەتا رۆژھلاتاناڤین و ئافریکایا باکور ھێزا خوە ئاکتیڤە کرییە و گراناھییا خوە ددە نیشاندان. رووسیا د ڤان شەرتێن ئیرۆ دا زێدەتر ب فرسەتێن لۆکال پۆلیتیکا خوە دگێرینە. ب تایبەتی ل کافکاسیا، ئاسیایا ناڤین و رۆژھلاتاناڤین ل گۆرەیی بەرژەوەندییێن خوە مانەورایێ دکە. چین ئیرۆ زێدەتر ب فرەھکرنا بازارا خوەیا ئابۆرییێیا ل سەرانسەرێ دنیایێ ڤە مژوولە. ژاپۆنیا ھەرچەند ب سەرێ خوە ھێزەکە مەزنیا ئابۆری و تەکنۆلۆژییا دیژیتال ژی بە ل دنیایێ، د وارێ پۆزسیۆنا ستراتەژیک دا دگەل جیھانا رۆژاڤایێ ب رێ دکەڤە.

ل بەر ڤێ تابلۆیێ ب تایبەتی "جیھانا رۆژاڤایێ" ژ سەرێ سالێن ١٩٩٠ی وەرە ستراتەژییەکە نوو دایە بەر خوە و ب سلۆگانا "دەمۆکراسییێ" پۆزسیۆنەکە نوو وەرگتییە. پراتیکا وانیا ئەولی ژ ئراقێ دەست پێ کر و د چارچۆڤەیا ڤێ ستراتەژییا نوو دا کوردان کاری خوە نیشان بدن و ب ڤی رەنگی ل پارچەیێ باشوور ئاڤابوونەکە نوو دەرکەتە مەیدانێ کو ئەڤە بوو دەستکەڤتا پێشینیا کوردان. جیھانا رۆژاڤایێ ل گۆرەیی ڤێ ستراتەژییا خوەیا نوو ژ سەرێ ڤێ سالێ [٢٠١١] پێڤە دەستەکێ ددنە گوھۆرینێن ئافریکایا باکور و ھەروەھا رۆژھلاتانێزیک. ل مسرێ گوھۆرینەکە ل گۆرەیی بەرژەوەندییێن خوە دیزاین کرن، نھە ل سەر لبیایێ ڤێ ئۆپەراسیۆنا خوە ددۆمینن و ڤێ گاڤێ ژی دۆر ھاتییە سوورییەیێ. د ڤێ پرۆسەسا نوو دا ژ ئالییێ پرەنسیبی ڤەیا راست ئەوە کو ھەر گوھۆرین ب دینامیکێن خوە پێکبێت و خەلک رێیا چارەسەرییا خوەزی و داخوازێن خوە ب خوە ببینن و ب جھ بینن. لێ مخابن کو سیستەمێن دیکتاتۆریال کو پرانییا وان ب دەستەک و پشتەڤانییا جیھانا رۆژاڤایێ ل سەر کار بوون، ژییان ل خەلکێن خوە ھەرام کرن و رێ ل بەر ھەموو گوھۆرینا گرتن. ئەڤ سیستەمێن دیکتاتۆریال د رۆژا ئیرۆ دا ئێدی بەرژەوەندییێن جیھانا رۆژاڤایێ ژی تێخن تەھلیکەیێ. لەوما ژی جیھانا رۆژاڤایێ د ئەساس دا بۆ ئەولەکارییا بەرژەوەندییێن خوە رێیەکە نوو دانینە بەر خوە. لێ بەلێ، ئیرۆ ئەم دبینن کو کریتەرێن ڤان دەستەکێن جیھانا رۆژاڤایێ نە ستابیلن و ب تەنێ ل گۆرەیی "بەرژەوەندییان" کڤش دبن. ئەڤ "ھەڤکارییا بێرێزک"یا جیھانا رۆژاڤایێ ل رۆژھلاتاناڤین ب تایبەتی د پرسا کورد و کوردستانێ دا گەلەک ب زەلالی خویا دبە. ئامەریکا ویە ل ئراقێ ب ھەڤ را ھەرەکەت دکن، ل گۆرەیی ئارمانج و بەرژەوەندییێن خوە دەستەک دانە ئاڤابوونا کوردستانا فەدەرالیا د ناڤ ئراقا فەدەرال دا کو ئەم ژی د چارچۆڤەیا ماف و بەرژەوەندییێن نەتەوەیێ کورد و کوردستانێ دا پشتەڤانییێ دکن. لێ ئەڤ پۆزسیۆنا وانیا دەستەکدایینا "گوھۆرینێن ناڤچەیێ" ب ئەینی ستاندارتێ ب رێ ناکەڤن. ل ئرانێ ب رەنگەکێ، ل سوورییەیێ جودا و ل ترکییەیێ ب تمامی کۆنسەپتەکە ”دەرڤەیی رووتینێ” ب کار تینن.

ی. ترکییە وەکی ئەنداما ناتۆیێ دگەل کو د ناڤ خوە دا ب گشتی پۆلیتیکێن ئانتی دەمۆکراتیک، ل کوردستانێ ژی سیستەمەکی کۆلۆنیال، داگیرکەر و ئاسیمیلاسیۆنیست ب کار تینە ژی، لێ دیسا ڤە "دسکریمیناسیۆنەکە پۆزیتیڤیا تایبەتی" دبینە ژ تەرەف جیھانا رۆژاڤایێ و ب تایبەتی ژی ژ ئامەریکایێ. ترکییە کارتێ خوەیێ ناتۆیێ باش دفرۆشە ل جیھانا رۆژاڤایێ. د پرسگرێکێن ناڤچەیێ و ھەتتا ئاسیایا ناڤین دا، وەکی ئافگانستانێ، بازارەکە ب دلێ خوە دکە دگەل جیھانا رۆژاڤایێ. جیھانا رۆژاڤایێ ژ بەر ڤان سەبەبان چاڤێ خوە ل ئانتی دەمۆکراتیزما ترکییەیێیا ل سەر کورد و کوردستانێ دگرە و ھەتتا ھەم چەکێن سڤک و گران دفرۆشنێ ھەم ژی ب دەستەکا لۆژیستیک ھەڤکارییەکە مەزن دگەل دکن. ترکییە ژ بەر ڤێ ئەندامەتییا خوەیا ناتۆیێ خوەشبینییەکە بێتخووب دبینە ژ جیھانا رۆژاڤایێ. لەوما ژی دەولەتا ترک د پرسا کورد و کوردستانێ دا گاڤێن پێکھاتنەکە ماقوول نااڤێژە و تام بەرەڤاژی وێ، پۆلیتیکا شددەتێ زێدەتر ب کار تینە. دەولەتا ترک ڤێ گاڤێ ب ھزاران پۆلیتیکەرێن کورد گرتنە و ژ ئالییێ لەشکەری ڤە ژی ژ خوە ئەڤ دەمەکی درێژە ئۆپەراسیۆنێن گەلەک خەدار پێکتینە. ھەما د ڤان دو مەھان دا نێزیکی چل گەریڵا شەھیت کرنە. دەولەتا ترک زولم و زۆرا ئەرتێشێ و پۆلیسی دگەل سیستەمێ دادگەھێ ئادەتا کرنە تۆکا مرنێ د ستویێ گەلێ کورد دا. ژ بەر ڤان بنپێکرنێن ماف و ئازادییانیێن دەولەتا ترک، دڤێت رەخنە ل جیھانا رۆژاڤایێ، ل ئامەریکا، ل یەیێ بێتە کرن کو ل نۆرمێن خوەیێن ”دەمۆکراسییێ” سادق بن و ل تەرەفێ ئازادیخواز و دەمۆکراسیخوازان بن کو ئەڤە تەرەفێ کورد و کوردستانییانە.

ی. دگەل کو زولما دەولەتا ترک ھندە زێدە بوویە و ھاتییە مەرھەلەیەکە نوو، لێ بزاڤا بەرخوەدانا گەلێ کورد و کوردستانییان ژی ھاتییە قۆناخەکە نوو. خەلک ئێدی پێکڤە ل سەر پێیا نە. باژێر بووینە چەپەرێن تێکۆشینێ. شەرێ مەزن نھە کەتییە ناڤ جادە و کۆلانان و خەلک ب زارۆک، ژن، مێر و پیرێن خوە ڤە بێیی ترس ل پێش ئێرشا لەشکەر و پۆلیسان رادوەستە. د ڤێ سەکنا خەلکێ کوردیا ب روومەتیا ل بەرامبەری دەولەتا ترک دا تۆڤێ ھێڤییا مەزن شین بوویە. ئەو ھێڤی سەرکەڤتنا بزاڤا نەتەوەیییە. دیتنا ڤێ ئەنجامێ نە دوورە. ئەڤ پێلا نوو رابوویی گەلەک ب ئەساسی ژ بنی ڤە تێت و دێ ببە تسوونامییەکە مەزن و ب سەر دەولەتا ترک دا ھەرکە. ل ترکییە و کوردستانێ د ڤان شەرت و مەرجان دا ھلبژارتن دێ پێکبێن. ئەنجامێن ھلبژارتنا ١٢ێ ھەزیرانا ئیسال دێ ببنە پێلکێن ئەولییێن رابوونا کورد و کوردستانییان. تێتە ھێڤی کرن کو د ڤان ھلبژارتنان دا ھەژمارەکە بلندیا پارلەمەنتەرێن کورد، کوردستانی و تفاقداران بێنە ھلبژارتن کو چەپەرێ پارلەمەنتۆیا ئانکارایێ ژی ببە زەمینەکی گرنگیێ تێکۆشینا نەتەوەیی و دەمۆکراسییێ. ژ بەر ڤێ یێکێ ئەم بانگی کورد و کوردستانییان دکن کو دەستەکدایینا نامزەتێن بلۆکا کەد، ئازادی و دەمۆکراسییێ وەکی ئەرکەکی نەتەوەیی ببینن و ب ھەر رەنگی ھەڤکارییێ دگەل نامزەتان بکن و ل سندۆق و رەھییێن خوە خوودان دەرکەڤن و نامزەتێن بلۆکێ رێبکن پارلەمەنتا ئانکارایێ کو وێ پارلەمەنتێ ژی بکنە چەپەرێ بزاڤا نەتەوەیی.

ئڤ. ل ئالییێ دی پرسا کورد و کوردستانێ ئیرۆ ھاتییە قۆناخەکە نوو. ڤێ گاڤێ دەولەتا ترک دگەل سەرۆکێ پککێ برێز ئۆجالان د ھەفسا گراڤێ ئمرالییە دا ھەڤدیتنا دکە. ئەم ڤان ھەڤدیتنان گەلەک گرنگ دبینن. کنک ھێڤی دکە کو ئەڤ دیالۆگا ھەیی ھلکەڤە دەرەجەیا موزاکەرەیەکە ئەنجامگر کو چارەسەرییەکە ماقوول ژێ دەرکەڤە. تێتە دیتن کو برێز ئۆجالان د ڤان ھەڤدیتنان دا رەفتار و ھەلوەستەکە چێکەر نیشان ددە و رێ ل بەر پێشھاتنێن دەمۆکراتیک ڤەدکە. لێ بەلێ ب ڤان ئێرشکارییێن داوییێ ئەم دبینن کو دەولەتا ترک ڤێ پۆزسیۆنا پۆزیتیڤیا ئۆجالان ب باشی و لایق ب کار نایینە. ئەم وەکی کنک پشتەڤانییا پۆزسیۆنا ئۆجالان دکن و بانگ ل دەولەتا ترک دکن کو ڤێ فرسەتێ ژ دەست نەرەڤینن و داخوازێن دەمۆکراتیکیێن کورد و کوردستانییان قەبوول بکن و د پراتیکێ دا ب جھ بینن.

ڤ. بزاڤا نەتەوەیی ل رۆژھلات ژی ھەر دچە پێش دکەڤە. دەولەتا ئرانێ د دەستێ ڤێ رەژما ھۆڤیا ئایەتوڵاھان دا کەتییە کریزەکە کوور. روویێ ڤێ رەژمێ نە ل ناڤ خەلکێن خوە، نەژی ل دنیایێ مایە. رەژم تەنێ ب شددەتێ خوە رادگرە. پۆلیتیکا "چەکا نوکلێر" بۆ خوە کرییە زرھ و مەتال و ب ڤێ ستراتەژییێ دخوازە ژییێ دەستھلاتا خوەیا نەمرۆڤی درێژ بکە. پۆلیتیکا ئامەریکا و یێکتییا ئەورووپایێیا بەرامبەری رەژما ئایەتوڵاھان د ڤان دەمان دا گەلەک ل بەر چاڤان نەبە ژی ددۆمە و بەرپێیێن رەژمێ تەنگ بوونە. ئامەریکا ویە پشتی ڤان بوون و بوویەرێن ل ئافریکایا باکور و رۆژھلاتانێزیک ل کەیسەکێ دگەرن کو رەژمێ تەنگاڤ بکن و رێ ل بەر ھلوەشینا وێ ڤەکن. کورد ھەم ب سەرێ خوە، ھەم ژی دگەل تفاقدارێن خوە دڤێت خوە ئامادەیی پێشھاتنێن موھتەمەل بکن کو رۆلا خوەیا دەمۆکراتیزاسیۆنا ل ئرانێ ب جھ بینن. د ڤی واری دا ئەم ب گرنگی ل سەر یێکتییا ھێز و کەسێن کورد و کوردستانییێن ل رۆژھلات رادوەستن و دڤێت ھەموو ھەز و کەسێن کورد و کوردستانی ل رۆژھلات ئەنییەکە نەتەوەیی پێکبینن و ب ھەڤ را کۆنفەرانسەکە ھێز و کەسێن نەتەوەیییێن رۆژھلات چێبکن و دژی رەژما ئایەتوڵاھان چەپەرەکی خورت و ساخلەم ئاڤا بکن کو د پێشھاتنەکە نوویا ل ناڤچەیێ بکارن رۆل و مسیۆنێ خوەیێ پێشەنگییێ و رێڤەبرن و کۆنترۆلکرنا بزاڤا نەتەوەیی ب ئەساسی بکن.

ڤ. بەرخوەدان و تێکۆشینا خەلکێ کوردیا ل رۆژاڤایێ، ل سوورییەیێ ژی بەردەوامە. رەژما سوورییەیێ د ڤان دەمان دا کەتییە ناڤ تەنگاڤییەکە مەزن. پێلا خەلکییا ژ ئافریکا باکور دەست پێ کری ناڤا سوورییەیێ ژی ھەژاندییە و ئەڤ رەوشا ئالۆز ھاتییە مەرھەلەیەکە نوو. شەرتێن ھلوەشینا رەژمێ پێکھاتنە. خەلک ب ھەر ئاوایی نەرازیبوونا خوە نیشان ددە. خەلکێ کورد ژی ڤێ نەرازیبوونا خوە ب رەنگەکی سڤیل و دەمۆکراتیک ددە نیشاندان. ئامەریکا ویە د پرسا سوورییەیێ دا ل گۆرەیی بەرژەوەندییێن خوە "ھێدی و ھەسساس" ھەرەکەت دکن. دگەل ھندێ ژی گوھۆرینەکە گرنگ دێ ل سوورییەیێ پێکبێت. ھەرچەند رەژما سوورییەیێ پێیێ خوە ئاسێ دکە و شددەتەکە بێتخووب ب کار تینە ژی لێ ئەڤە نابە سەبەبێ مایینا رەژمێ. زەمینێ رەژمێ ھاتییە لەقاندن. کورد دڤێت ببنە پارچەیەکی خوودان ئەرک و رۆلیێ پرۆسەسا نوویا گوھۆرینێ. لێ ژ بۆ ڤێ یێکێ دڤێت ھەم پۆلیتیکا خوەیا بەرخوەدانێ بدۆمینن، خورتتر بکن، ھەم ژی د ناڤ خوە دا ئەنییەکە ھەری فرەھ پێکبینن کو بکارن د روودانێن نوو دا بزاڤا خەلکی مۆبیلیزە و کۆنترۆل بکن و خوە بکنە ھێزەکە ئەساسی د ناڤ سوورییەیێ دا. گوھۆرینا رەژما سوورییەیێ ل بەر دەرییە و ھەموو دینامکێن بزاڤا خەلکێ کورد دڤێت ئامادەکارییێن خوەیێن پێدڤی بکن و ب کۆنفەرانسەکە بەرفرەھ خوە ھازری ھەموو شەرت و مەرجان بکن کو د دەمەکی وسا دا دەستکەڤتێن خوە بپارێزن و رۆلا خوە بلەیزن.

ڤی. ھەکە ئەم ل سەرانسەرێ کوردستانێ و کۆنژۆنکتورا رۆژھلاتاناڤین و دنیایێ بنێرن، پرۆسەسا پێشکەڤتنا دۆزا کوردستانێ بلندە و پێشییا خەلکێ کورد رۆناھییە. وەخت و بوویەرێن دقەومن شانسێ سەرکەڤتنا کوردان زێدەتر دکە. پرۆسەسا گوھۆرینا ل ناڤچەیێ ھێدی، ب ڤیراژ، ئەڤراز و نشیڤی ژی بە ددۆمە و کورد دڤێت ببنە پارچەیێ ئەساسییێ ڤێ پرۆسەسا نوو. کورد ب ھێز و ئۆرگانیزەبوونا خوە، ب تێکۆشینا خوە ھازری ڤان پێشھاتنانن. ل ڤێ دەرێ خالا گرنگ و ژییانی تفاقا ناڤخوەیییا کوردانە. د ڤی واری دا پێشھاتنێن پۆزیتیڤ تێنە دیتن. بیر و باوەری و ھسسییاتا یێکگرتنا نەتەوەیی د ناڤ کوردان دا گەش دبە و دڤێت ئەڤ خەلەکە نەیێ بەردان. نموونەیا داوییێ ژی تفاقا ل باکوریا د پێشەنگییا کۆنگرەیا جڤاتا دەمۆکتاتیک [کجد] دا پێکھاتییە. د ھلبژارتنان دا رێخستن و شەخسییەتێن کورد و کوردستانی تفاق چێکرن و ب داخویانییەکێ ژی دەکلارە کرن. کنک ڤان گاڤێن تفاقییێن ناڤ کوردان گەلەک راست و د جھ دا دبینە و دەستەکێ ددێ. دیسا د پێشەنگییا کۆنگرەیا جڤاتا دەمۆکراتیک [کجد] دا ھەیەتەکە فرەھ سەرەدانییا کوردستانا فەدەرال کر و دگەل سەرۆک و رێڤەبرێن کوردستانێ ھەڤدیتن پێکینان و د ئەنجاما ڤێ سەرەدانییێ دا بریارا چێکرنا ”کۆنفەرانسا یێکتییا نەتەوەیییا کوردستانێ” ھاتە دەکلارە کرن. ئەم ڤێ گاڤا نوو ب گەرمییەکە ھێڤیدار پێشوازی دکن و پشتەڤانییێ لێ دکن. کورد و کوردستانی ڤێ سۆزدایینا چێکرنا ”کۆنفەرانسا یێکتییا نەتەوەیی” ل پاییزا ئیسال دڤێت ب ھسسییاتەکە مەزنیا نەتەوەیی تاقیب بکن و ل سەر راوەستن کو گاڤەک ژ ڤێ بریارێ پاشڤە نەیێ ئاڤێتن. کنک ب ناڤێ کورد و کوردستانییان دێ ل سەر ڤێ یێکێ ب گرنگی راوەستە کو ژ بۆ ڤان پێکھاتنان ب سالانە خەباتێ دکە. ئەم ھێڤی دکن کو د وارێ تفاقا ناڤخوەیی دا ئەڤ گاڤێن تێنە ئاڤێتن ب پرۆگرامێن پراتیک ژی بێنە ماییندە کرن.

ب ڤێ خالێ ڤە گرێدایی ئەم دخوازن ب کورتی ل سەر رەوشا کوردستانا فەدەرال ژی راوەستن. وەکی ھەرجار ئەم بێژن، شک تێدا نینە کو باشوور دەستکەڤتەکە مەزنیا ھەموو کوردانە و ئەم پێکڤە دەستەکێ ددنە ئاڤابوونا کوردستانا فەدەرال و ژ بۆ سەرکەڤتنا تێکۆشینا نەتەوەیییا کورد و کوردستانێ ل سەرانسەرێ وەلات چەپەرەکی خورت و ساخلەم دبینن. لێ دگەل ڤێ تەسبیتێ ئەم ھەروەھا دخوازن کو ل ڤی بەشێ وەلاتێ مەیێ ئازاد، دەمۆکراسی و ئازادییەکە کامل ژی پێشبکەڤە و جھ بگرە. خەلکێ کورد و ھەموو کوردستانییان دژی رەژما سەددام و بەاسێ تێکۆشینا ئازادی و دەمۆکراسییێ دان و سەرکەڤتن. لێ ڤێ گاڤێ دڤێت ئازادی و دەمۆکراسییێ ل ناڤ وەلاتی ئاڤا بکن. ھێڤی دکن کو ژ رێڤەبرییا پۆلتیک ھەتا ھەموو دەم و دەزگەھێن سڤیل و دەمۆکراتیک و خەلکێ کورد ژ بۆ پێشکەڤتنا مافێن مرۆڤی، ئازادی و دەمۆکراسییێ سەفەربەر ببن، ئەرک و واجبێن خوە ب جھ بینن. کوردستانا فەدەرال د ڤێ ئۆکیانووسا ئانتی دەمۆکراتیکیا رۆژھلاتاناڤین دا دڤێت ببە گراڤەکی ئازادی و دەمۆکراسییێ. خەلکێ کورد و کوردستانییان دگەل زەنگینییا ژییانێ ھەروسا ھەوجەھی ب زەنگینییا ماف و ئازادییان ژی ھەیە. ل بەر ڤێ راستییێ دیسا ھێڤی دکن کو دەمۆکراتیزاسیۆنا ل کوردستانا فەدەرال ب تمامی ب رەنگ و شێوەیێن دەمۆکراتیک پێکبێت و دەستھلاتا پۆلیتیک خوەشبینییەکە بێتخووب نیشانی دەمۆکراسی و ئازادیخوازان بدن. خەلک ژی بۆ مافێن خوەیێن دەمۆکراتیک دڤێت موتلەق ژ رێیا دەمۆکراتیک دەرنەکەڤن و د مەتۆدێن دەمۆکراتیک دا ئسرار بکن و بگھنە خوەزی و داخوازێن خوە. کنکێ د ڤی دەمێ کورت دا کار و خەباتێن خوە ل سەر ڤی ئەساسی ب رێ ڤە برنە و دایم ژ بۆ پێشکەڤتنا باشوور کار کرییە.

ڤی. نفووسەکە بۆشیا کوردان ل چارنکارێ دنیایێ بەلاڤە و دیاسپۆرایەکە فرەھیا کوردی پێکھاتییە. ژ بلی باژێرێن دەولەتێن سەردەستیێن کوردستانێ، نوفووسەکە بۆشیا دیاسپۆرایا کوردی ل جۆگرافیایا یێکتییا ئەورووپایێ [یە] کۆم بوویە. ل رووسیا و کافکاسیایێ، ل خۆرەسانێ، ل لوبنانێ، ئوردونێ گەلەک ژ بەرێ وەرە کورد ھەنە، ل ئاووسترالیا، ئامەریکا، کانادا و ئسرایلێ ژی دیاسپۆرایا کوردی پێک ھاتییە. خەباتێن نەتەوەیییێن د ناڤ دیاسپۆرایا کوردی دا دگەل ھەموو زۆر و زەھمەتییان پێشدکەڤن. ژ ئالییێ پۆلیتیک ڤە بلندبوونا ھسسییاتا نەتەوەیی و ل بھایێن نەتەوەیی خووداندەرکەتنێ ئۆرگانیزەبوونەکە خورت ھەیە. لێ پرۆبلەمەکە ئەساسییا ل ناڤ کوردێن دیاسپۆرایێ پاراستنا ھوڤییەتا نەتەوەیییە. د سەرێ وان دا ژی زمان تێتن. نفشێ نوو مخابن کو د ناڤ چەرخا ئاسیمیلاسیۆنا دەولەتێن لێ دژین دا دھەلن. کولتورا نەتەوەیی دگەل ئاسیمیلەبوونا زمانێ کوردی بەرزە دبە. کنک د سەری دا زمان و ھەموو کار و خەباتێن کولتور و ھونەرییێن نەتەوەیی دکە و دێ ڤان کارێن خوە بدۆمینە. کنک دخوازە ب گرنگی بالا ھەموو دەم و دەزگەھێن نەتەوەیی بکێشە کو پرسا زمان دڤێت سست نەیێ گرتن و ژ بۆ پەروەردەیا زمانێ کوردی و ھەروەھا پەروەردەیا ب زمانێ کوردی خەبات، پلان و پرۆژەیێن نوو بێنە کرن. دڤێت بێتە زانین کو پاراستنا زمانێ کوردی گارانتییا پاشەرۆژا نەتەوەیێ کوردە.

ئخ. کۆمبوونا گشتی [جڤاتا ١١.] ژ بلی ڤان تەسبیتێن ھاتنە کرن ئەڤ داخوازێن ئاکتوەل و گرنگ ژی ب لەزینی کرن.

ا. کورد و کوردستانی ل ترکییە و کوردستانێ دڤێت ب ھەژمارەکە ھەری بلند بەشداری ھلبژارتنێن ١٢ێ ھەزیرانێ ببن و دەستەکێ بدنە نامزەتێن بلۆکا کەد، ئازادی و دەمۆکراسییێ.

ب. ژ بۆ ئازادییا سەرۆکێ پککێ ئابدوڵاھ ئۆجالان و ھەموو گرتییێن پۆلیتیک خەباتێ بکن و ب تایبەتی بۆ زیندانییێن کورد و کوردستانی و کێمانییێن دییێن ل ئران و کوردستانێیێن ل بەر ئدامێ خەباتەکە نەتەوەیی و ناڤنەتەوەیی بێتە فرەھ کرن.

ج. ژ بۆ تفاقا ناڤخوەیی فەداکاری و تێکۆشین بێتە بلند کرن و تەمسیلییەتا نەتەوەیییا د جڤاتا ١١.یا کنکێ دا پێکھاتی بێتە مەزنتر، فرەھتر و خورتتر کرن.

د. خوەزا و ژینگەھا کوردستانێ ب بەرپرسیارییەکە مەزنیا نەتەوەیی و مرۆڤی بێتە پاراستن.

خ. کۆمبوونا گشتی [جڤاتا ١١.]یا کنکێ ب ڤان بیر و ھزر و ھسسییاتا ھەری بلندیا نەتەوەیی داخوازێ ژ کورد و کوردستانییان دکە کو د پێکینان و ب جھ ئینانا خواستەک، ئەرک و واجبێن نەتەوەیی دا، یێکگرتن و تفاقا ناڤخوەیی دایم د ناڤ خوەشبینییەکە ھەری فرەھ دا ژ بۆ دۆزا مەزن، دۆزا کورد و کوردستانێ خەبات و تێکۆشینێ بێیی وەستان و راوەستان بکن و بدۆمینن.

 

 

کۆمبوونا گشتی [جڤاتا ١١.]یا کنکێ

کۆنسەیا رێڤەبریا کنکێ

٢٩ گولان [مای] ٢٠١١، بروکسەل

 

 

له‌ چاوه‌ی کامێڕاوه