بۆ بیر و رەھییا گشتییا کوردستانێ، رۆژھلاتاناڤین و جیھانێ

کۆنگرەیا نەتەوەیییا کوردستانێ:

دەکلاراسیۆنا ئەرک و مافێن نەتەوەیییێن کورد و کوردستانییان

کۆمبوونا گشتی [جڤاتا ١١.]یا کنکێ ڤێ دەکلاراسیۆنێ وەکی بەلگەیەکە گرنگیا دیرۆکی قەبوول دکە و پێشکێشی بیر و رەھییا کوردستانێ، رۆژھلاتاناڤین و جیھانێ دکە.

 

١. ناڤێ جۆگرافیایا کو کورد و خەلکێن دییێن کێمانی ب ھەڤ را لێ دژین کوردستانە و ناڤلێکرنێن کۆلۆنیالیست و داگیرکەران رەد دکە و بانگ ل کورد و کوردستانییان دکە کو ناڤێ کوردستانێ ب جەسارەت بێژن و ب کار بینن.

٢. کورد و کوردستانی مافدارن کو ل سەر ئاخا خوە قەدەرا خوە تایین بکن و رەنگێ دەستھلاتدارییا خوە ل گۆرەیی داخوازێن خوە تەسبیت بکن.

٣. کورد و کوردستانی، ب تایبەتی ل باکور، رۆژھلات و رۆژاڤایێ و ھەروەھا ناڤچەیێن کو ل باشوور دەرڤەیی تخووبێن کوردستانا فەدەرال مانە، ناڤێن جھ و وارێن کوردستانێیێن کو دەولەتێن ترک، ئیران و سوورییەیێ و ھەروەھا ئراقا بەاسێ ب ئامانجا ئاسیمیلاسیۆن و ژەنۆسیدێ گوھۆری و کرنە ترکی، فارسی و ئەرەبی ب بریاردارییەکە بلندیا نەتەوەیی قەبوول نەکن و ناڤێن کوردی ویێن زمانێ خوە بێژن و ب کار بینن.

٤. کورد و کوردستانی، ھەولدانێن تەنگکرنا تخووبێن کوردستانا فەدەرال قەبوول نەکن و د سەری دا کەرکووک و ھەموو ناڤچەیێن د ناڤ تخووبێن خوەزایییێن کوردستانێ دا بپارێزن.

٥. کورد و کوردستانی، ل ترکییە، ئیران و سوورییەیێ ناڤێن ب زمانێ خوە دانن سەر زارۆکێن خوە و پاشناڤێن خوەیێن ترکی، فارسی و ئەرەبی بگوھۆرن و بکنە کوردی و زمانێ خوە.

٦. کورد و کوردستانی، ماکزمانێن خوە ھاکمی ژییانا خوە بکن و داخوازا پەروەردەیا ب ماکزمانێن خوە بلندتر بکن و پرزمانییێ ل سەر ھەموو دەم و دەزگەھێن دەولەتێن سەردەست "دە فاجتۆ" فەرز بکن.

٧. ئالا، فلاما و سەمبۆلێن نەتەوەیی ل ھەر دەرێ پێدڤی ب کار بینن و د رۆژێن کو مانایا خوەزی و داخوازێن نەتەوەیی ددن دا جل و بەرگێن نەتەوەیی بکن بەر خوە.

٨. بازرگان و ئەسنافێن کورد و کوردستانی، تمامی فرۆشکاری و بزاڤا خوەیا بازرگانی ب کوردی و زمانێن خوە بکن و خەلک ژی کریارییا خوە ب زمانێ خوە بکن.

٩. کورد و کوردستانی، باوەری، دین و دیانەتا خوەیا خوومال بژین و واجبێن باوەرییێن خوە ل گۆرەیی رێز و رێزکێن خوە ب جھ بینن و دین و دیانەتا "فەرمی" رەد بکن و ب جھ نەیینن.

١٠. کورد و کوردستانی، ھەموو جوداھییێن خوەیێن ژ سیستەم و کولتورا فەرمییا دەولەتێن سەردەست دەرێخنە پێش و شین و شاھییێن خوە، ژییانا خوە ب جوداھی و رەنگێن خوەیێن نەتەوەیی ڤە بژین.

١١. کورد و کوردستانی، ل ھەموو پارچەیێن کوردستانێ و مەیدانێن دیاسپۆرایێ د دەرەجەیا ھەری بلند دا پشتەڤانییا نەتەوەیی خورت بکن و دژی کر و کریار و دەک و دۆلابێن دەولەتێن سەردەست ب ھشیاردارییەکە بلندیا نەتەوەیی دەستەکەکە موتلەق بدنە ھەڤدو.

١٢. کورد و کوردستانی، ژ بۆ پەیداکرن و وەرگرتنا دەستەک و ھەڤکارییێن ناڤنەتەوەیی، د سەری دا دگەل دەمۆکرات و پێشڤەروویێن ژ خەلکێن سەردەست و ھەروەھا ھەموو ھومانیستێن جیھانێ، خەبات و تێکۆشینەکە فەدەکارانە بکن.

١٣. کورد و کوردستانی، د سەری دا بۆ ئازادییا سەرۆکێ پککێ ئابدوڵاھ ئۆجالان و ھەموو گرتییێن پۆلیتیکیێن ل سەرانسەرێ دەولەتێن کۆلۆنیالیست و ل وەلاتێن دی، خەبات و تێکۆشینێ وەکی پشتگرییەکە نەتەوەیی قەبوول بکن و د ناڤ ھەولدانان دا بن.

١٤. کورد و کوردستانی، پشتەڤانییا ھەری مەزن بدنە پێشەنگییا پۆلیتیک و لەشکەری و ل بزاڤا نەتەوەیی خوودان دەرکەڤن و ھەروەھا جوانێن کورد و کوردستانی لەشکەرییا دەولەتێن سەردەست رەد بکن و نەچنە ئەسکەرییێ.

١٥. کورد و کوردستانی، ھەموو ئەدەتێن کەڤنەپەرەستی و زۆرداری و دەستھلاتییا مێرشاھییا ل سەر ژنێ رەد بکن و مافێن ژنان د دەرەجەیا وەکھەڤییێ دا بگرن و ب جھ بینن.

 

کۆمبوونا گشتی [جڤاتا ١١.]یا کنکێ

٢٨ - ٢٩ گولان [مای] ٢٠١١، بروکسەل

له‌ چاوه‌ی کامێڕاوه