ره‌مه‌زان... له‌ نێوان پابه‌ندبوون به‌ ئاسمان و رێزگرتن له‌وانه‌ى سه‌ر زه‌وین

پێشه‌کى

مانگى ره‌مه‌زان نۆیه‌م مانگى رۆژژمێرى کۆچییه‌، مانگێکى به‌رَێزه‌ لاى موسلمانان، که‌ ده‌کاته‌ مانگى به‌ رۆژووبوون، که‌ موسلمان له‌و مانگه‌ دا نزیک خواردن و خواردنه‌وه‌ و سێکس نابن له‌ رۆژهه‌لآتن تا رۆژئاوابوون، هه‌روه‌ها ره‌مه‌زتن پێگه‌ى تایبه‌ت و به‌رزى خۆى هه‌یه‌ له‌ نێو که‌لتوور و مێژووى موسلمانان، چونکه‌ پێیان وایه‌ له‌م مانگه‌ دا له‌ ساڵى (٦١٠ز) قوڕئان بۆ پێغه‌مبه‌ر (محمد) دابه‌زیوه‌.

کۆمه‌ڵێک بۆچوون هه‌ن سه‌باره‌ت به‌ واتاى ناوى ره‌مه‌زان، هندێک ده‌ڵێن له‌ گه‌رما هاته‌وه‌، هندێکیش ده‌ڵێن کاتێک عه‌ره‌به‌کان ده‌ستییان به‌ گۆڕینى ناوى مانگه‌کان بۆ سه‌ر زمانى عه‌ره‌بى کرد ئه‌م مانگه‌ که‌وته‌ وه‌رزى گه‌رما و ناویان لێنا ره‌مه‌زان به‌ واتاى ئاگر و گه‌رما.

موسلمانان ده‌ڵێن له‌ به‌ها و بایه‌خ و پیرۆزیى ره‌مه‌زان ئه‌وه‌یه‌ که‌ له‌م مانگه‌ دا ده‌رگاکانى به‌هه‌شت ده‌کرێنه‌وه‌ و ده‌رگاکانى دۆزه‌خ داده‌خرێن و خودا له‌و که‌سانه‌ ده‌بووریت که‌ به‌ رۆژوو ده‌بن، هه‌روه‌ها پێیان وایه‌ که‌ ئه‌م مانگه‌ پاکببونێکه‌ بۆ خودى مرۆڤ و نزیکبوونێکه‌ له‌ خودا.

به‌ر له‌ رۆژهه‌لآت مۆسلمانان ژه‌مێکى دیکه‌ى خواردن ده‌خۆن که‌ ناوى (پارشێو)ه‌ بۆ ئه‌وه‌ى ئاماده‌بن بۆ به‌ رۆژوو بوون له‌ رۆژى دواتر، موسلمانان ده‌ڵێن به‌ها و رێزى (پارشێو) زۆره‌ و پێغه‌مبه‌رى موسلمانان له‌م باره‌وه‌ ده‌ڵێت: "پارشێو به‌ره‌که‌ته‌".

له‌ کاتى به‌رۆژوو بوون دا پێویسته‌ موسلمان دوورکه‌وێت له‌ گوفتارى ناشرین و کرده‌وه‌ى به‌د، ئیسلام ده‌ڵێت پێویسته‌ ئه‌و موسلمانه‌ به‌ رۆژوویه‌ى که‌ تووشى گوفتار و کارى به‌د ده‌بیت له‌ لایه‌ن که‌سێکى دیکه‌وه‌ خۆى رابگریت و ولآمى نه‌داته‌وه‌ و ته‌نها بڵێت: "خودایه‌ من به‌ رۆژووم".

(شه‌وى قه‌در) ئه‌و شه‌وه‌یه‌ که‌ قورئانى تێدا دابه‌زیوه‌ به‌لآم دیار نییه‌ کێهان شه‌وه‌!! ئیتر هندێک ده‌ڵێن شه‌وى (٢٧)ى ره‌مه‌زانه‌، که‌چى هندێک زاناى دیکه‌ پێیان وایه‌ که‌ ئه‌م شه‌وه‌ دیار نییه‌؛ به‌لآم شه‌وێکه‌ له‌ ده‌ه شه‌واى کۆتایى مانگى ره‌مه‌زان و شه‌وێکى تاکه‌.

به‌ پێى قورئان؛ موسلمانى ناساغ و گه‌شتیار بۆى هه‌یه‌ به‌ رۆژوو نه‌بیت و ده‌کرێت له‌ ماوه‌یه‌ک و کاتێکى دیکه‌ دا قه‌ره‌بوویان بکات، هه‌روه‌ها ئیسلام رێگاى داوه‌ بۆ ئه‌و که‌سه‌ى پێى ده‌کرێت به‌ رۆژوو ببیت به‌لآم خۆى حه‌زى لىَ نییه‌ بڕه‌ پاره‌یه‌کى دیاریکراو که‌ ده‌کاته‌ پاره‌ى ژه‌مێک خواردن بیداته‌ هه‌ژارێک به‌رامبه‌ر هه‌ر رۆژێک که‌ نه‌یگرتووه‌.

به‌لآم ئه‌وانه‌ى به‌ رۆژوو نه‌بن بۆیان نییه‌ ئه‌وه‌ دیار بکه‌ن به‌ شیوه‌یه‌کى ئاشکه‌را، چونکه‌ ئه‌م کاره‌ په‌سند نییه‌ لاى زۆربه‌ى زۆرى موسلمانان، بۆیه‌ش یاساکانى ولآتانى موسلمان داکۆکى له‌سه‌ر سزادانى ئه‌و که‌سانه‌ ده‌که‌ن که‌ بىَ رۆژوو بوونى خۆیان له‌ نێو شوێنه‌ گشتییه‌کان دا ئاشکه‌را ده‌که‌ن، ئیتر سزاکه‌ش له‌ ولآتێک بۆ ولآتێکى دیکه‌ ده‌گۆردرێت، له‌ نێوان سزاى دراوى یان چه‌ند رۆژێکى زیندانى کردن یان ئه‌نجام دانى هندێک خزمه‌تگوزارى سڤیل به‌ خۆڕایى دایه‌.

کوردستانیش و له‌به‌ر ئه‌وه‌ى زۆربه‌ى دانیشتووانى موسلمانن پابه‌نده‌ به‌ پرنسیپه‌کانى ئیسلام سه‌باره‌ت به‌ مانگى ره‌مه‌زان، بگره‌ هه‌موو ژیان له‌ ره‌مه‌زان دا ده‌گۆڕدرێت، هه‌روه‌ها کاته‌کانى کاره‌ فه‌رمى و نا فه‌رمییه‌کانیش گوڕانکارى به‌سه‌ردا دێن، بۆیه‌ش هندێک که‌س پێیان وایه‌ که‌ ئه‌م گوڕانکارییه‌ ده‌بێته‌ مایه‌ى دواکه‌وتنى کاره‌کان و هۆیه‌کى راسته‌وخۆ بۆ دواکه‌تنى تێکراى ولآت؛ چونکه‌ ژیانى نۆرماڵ له‌م مانگه‌ دا له‌کار ده‌که‌ویت، که‌چى هندێک که‌سى پێیان وایه‌ که‌ ئه‌مه‌ راست نییه‌ چونکه‌ ئه‌و کارانه‌ که‌ پێویسته‌ له‌ رۆژ دا ئه‌نجام بدرێن و ئه‌نجام نه‌دراون له‌به‌ر ره‌مه‌زان ده‌کرىَ به‌شه‌و ئه‌نجام بدرێن پاش کۆتایى هاتنى ماوه‌ى به‌رۆژوو بوون.

له‌ لایه‌کى دیکه‌وه‌ هندێک که‌س پێیان وایه‌ که‌ حکوومه‌ته‌کانى ولآتانى ئیسلام نشین تا رادده‌یه‌ک توندن به‌رامبه‌ر به‌ هاولاتییانى نا موسلمان و خاوه‌ن ئاینه‌کانى دیکه‌ سه‌باره‌ت به‌ جێبه‌جێکردنى یاساکانى تایبه‌ت به‌ خه‌ڵکى موسلمان، که‌ به‌ پێى ئه‌و یاسایانه‌ بۆ نا موسلمانه‌کانیش قه‌ده‌غه‌یه‌ به‌ ئاشکه‌را ده‌ست بۆ خواردن و خواردنه‌وه‌ى به‌رن و هه‌روه‌ها هه‌موو مه‌یخانه‌ و کلآپه‌کانى شه‌وان و هه‌موو ره‌نگدانه‌وه‌ى ژیانى سڤیل و ئازاد له‌کار ده‌خرێن!!.

له‌م ڕاپرسییه‌دا که‌ هه‌وڵمان داوه‌ به‌ بىَ لایه‌نى و به‌ شێوه‌یه‌کى زانستى ئه‌نجامى بده‌ین، که‌ (٥٠٠) که‌س له‌ هه‌موو ته‌مه‌نێک و چین و ئایین و مه‌زهه‌ب و نه‌ته‌وه‌یه‌ک (کورد، تورکمان، کلدوئاشوورى، عه‌ره‌ب، ئه‌وانى دیکه‌) و له‌ هه‌ردوو ڕه‌گه‌ز له‌ هه‌ر (٥) پارێزگاکانى (هه‌ولێر، سلێمانى، که‌رکووک، دهۆک، مووسل) به‌شدارییان تێیدا کردووه‌، هه‌وڵمان داوه‌ ڕاى شه‌قامى کورستان بخوێنین له‌مه‌ڕ مانگى ره‌مه‌زان و ئه‌و گۆڕانکاریانه‌ى به‌سه‌ر ژیان دا دێن، وه‌کوو هه‌وڵێکى رژد له‌ لایه‌ن ئێمه‌وه‌ بۆ تێگه‌یشتنى سروشتى ئه‌م ڕایه‌ و ئه‌و ئه‌گه‌رانه‌ى له‌ پشته‌وه‌ى ده‌وه‌ستن، وه‌کو به‌شدارییه‌ک له‌ لایه‌ن ئێمه‌وه‌ بۆ گه‌لآڵه‌کردنى تێگه‌یشتنێکى ئاشکه‌را بۆ کاریگه‌ریه‌کانى ئه‌م مانگه‌ بۆ سه‌ر ژیان و ژیارى خه‌ڵکى کوردستان.

 

ئه‌نجامه‌کان

 

٠١- ئایا پێت وایه‌ ره‌مه‌زان ژیان له‌ کوردستان دا په‌کده‌خات؟

به‌ڵىَ: ٦٥.٣%

نه‌خێر: ٢٢.٦%

نازانم: ١٢.١%

 

٠٢- ئایا پێت وایه‌ ره‌مه‌زان مایه‌ى دواکه‌وتنى پێشه‌وچوونى کوردستانه‌؟

به‌ڵىَ: ٤٨.٧%

نه‌خێر: ٢٣.٩%

نازانم: ٢٧.٤%

 

٠٣- ئایا پێت وایه‌ ده‌کرێت ئه‌و کارانه‌ى له‌ رۆژانى ره‌مه‌زان دا دواده‌خرێن له‌ شه‌وان دا جێبه‌جىَ بکرێن؟

به‌ڵىَ: ٣١.٢%

نه‌خێر: ٥٧.١%

نازانم: ١١.٧%

 

٠٤- ئایا پێت وایه‌ بڕیارى حکوومه‌تى کوردستان به‌ داخستنى مه‌یخانه‌کان له‌ شوێنه‌ موسلمان نشینه‌کان دا بڕیارێکى راسته‌؟

به‌ڵىَ: ٦٦.٩%

نه‌خێر: ١٥.٢%

نازانم: ١٧.٩%

 

٠٥- ئایا پێت وایه‌ بڕیارى حکوومه‌تى کوردستان به‌ داخستنى مه‌یخانه‌کان له‌ شوێنه‌ نا موسلمان نشینه‌کان دا بڕیارێکى راسته‌؟

به‌ڵىَ: ٢٢.٥%

نه‌خێر: ٥٨.٦%

نازانم: ١٨.٩%

 

٠٦- ئایا پێت وایه‌ بڕیارى حکوومه‌تى کوردستان به‌ سزادانى که‌سانى به‌ ئاشکه‌را بىَ رۆژوویى خۆیان دیارده‌خه‌ن بڕیارێکى راسته‌؟

به‌ڵىَ: ٧٢.٣%

نه‌خێر: ٢١.٦%

نازانم:٠٦.١%

 

٠٧- ئایا پێت وایه‌ موسلمانان تا رادده‌یه‌ک تونده‌ڕه‌ون له‌ به‌دیارخستنى ئاینى خۆیان دا به‌ تایبه‌ت له‌ مانگى ره‌مه‌زان دا و به‌سه‌ر خه‌ڵکى دیکه‌ دا ده‌سه‌پێنن؟

به‌ڵىَ: ٦١.٤%

نه‌خێر: ٣٦.٨%

نازانم:٠١.٨%

 

پوخته‌

ئه‌نجامه‌کانى ئه‌م راپرسییه‌ ئه‌وه‌یان ئاشکه‌را کرد که‌ زۆرینه‌ى شه‌قامى کوردستان پێى وایه‌ که‌ ژیان له‌ ره‌مه‌زان دا به‌ره‌و لایه‌نى نه‌گه‌تیڤه‌وه‌ ده‌ڕوات، بۆیه‌ش (٦٥.٧%)ى به‌شداربووانى ئه‌م راپرسییه‌ پێیان وابوو که‌ ره‌مه‌زان ژیان له‌ کوردستان دا په‌کده‌خات، ئه‌مه‌ش نیشانه‌یه‌که‌ بۆ دواکه‌وتنى کاروباره‌ فه‌رمییه‌کان و نا فه‌رمییه‌کانى هاولآتییان له‌ کوردستان دا به‌هۆى ره‌مه‌زانه‌وه‌، ئه‌مه‌ش هه‌رگیز کاریگه‌رییه‌کى نا باشى هه‌یه‌ بۆ سه‌ر ژیارى هاولآتییان و نیگه‌رانیى ده‌خاته‌ دڵى خه‌ڵکه‌وه‌.

دیاره‌ ئه‌م نیگه‌رانییه‌ و راوه‌ستانى کاره‌کان ده‌بنه‌ مایه‌ى له‌دایک بوونى هه‌ستێکى زاڵ به‌سه‌ر خه‌ڵک دا که‌ ژیان راوه‌ستاوه‌ و رێڕه‌وى پێشکه‌وتن له‌ نێو قوڕى ره‌مه‌زان دا چه‌قیوه‌، بۆیه‌ش (٤٨.٧%)ى به‌شداربووانى ئه‌م راپرسییه‌ پێیان وابوو که‌ ره‌مه‌زان مایه‌ى دواکه‌وتنى کوردستانه‌، ئه‌مه‌ش نیشانه‌یه‌کى دیاره‌ بۆ هه‌بوونى هه‌ستێکى نائومێدیى زاڵ له‌نێو خه‌ڵکى کوردستان دا به‌تایبه‌تى له‌نێو هێزى ئه‌کتیڤ و کاریگه‌رى کۆمه‌ڵگا دا به‌ هۆى راوه‌ستانى ژیان له‌ ره‌مه‌زان دا و خه‌وتنى زۆرینه‌ى خه‌ڵک تا نیوه‌ڕۆ!!.

هندێک له‌ خه‌وتووه‌کان پێیان وایه‌ که‌ ئه‌و کارانه‌ى له‌ رۆژانى ره‌مه‌زان دا دواده‌خرێن ده‌کرێت له‌ شه‌وان دا ئه‌نجام بدرێن، به‌لآم ئه‌نجامه‌کانى ئه‌م راپرسییه‌ ئه‌وه‌یان ئاشکه‌را کرد که‌ زۆرینه‌ى شه‌قامى کوردستان پێى وایه‌ ئه‌مه‌ راست نییه‌، بۆیه‌ش (٥٧.١)ى به‌شداربووانى ئه‌م راپرسییه‌ پێیان وابوو که‌ ئه‌و کارانه‌ى له‌ رۆژانى ره‌مه‌زان دا دواده‌خرێن به‌ هیچ شێوه‌یه‌ک به‌هه‌مان کوالیتى و رێکوپێکى له‌ شه‌وان دا ئه‌نجام نادرێن، چونکه‌ هێزى کاریگه‌ر و ئه‌کتیڤى مرۆڤ له‌ به‌یانییان ده‌ست پىَ ده‌کات که‌چى له‌ شه‌وان دا مرۆڤ به‌شێوه‌یه‌کى گشتى به‌ره‌و هێمنى و بىَ ده‌نگیى هه‌نگاو ده‌نێت.

ئه‌نجامه‌کانى ئه‌م راپرسییه‌ ئه‌وه‌یان ئاشکه‌را کرد که‌ زۆرینه‌ى شه‌قامى کوردستان پاڵپشتى له‌ بڕیارى حکوومه‌تى کوردستان به‌ داخستنى مه‌یخانه‌کانى ناوچه‌ موسلمان نشینه‌کان ده‌که‌ن، بۆیه‌ش (٦٦.٩%)ى به‌شداربووانى ئه‌م راپرسییه‌ پێیان وابوو که‌ حکوومه‌تى کوردستان بڕیارێکى چاکى داوه‌ به‌داخستنى شوێنى مه‌ى فرۆشتن له‌ مانگى ره‌مه‌زان دا، به‌لآم هه‌مان ئه‌نجام ئه‌وه‌یان ئاشکه‌را کرد که‌ شه‌قامى کوردستان له‌گه‌ڵ ئه‌وه‌ دا نییه‌ که‌ حکوومه‌تى کوردستان ئه‌م بڕیاره‌ له‌سه‌ر ناوچه‌کانى نا موسلمان نشین دا بسه‌پێنیت، بۆیه‌ش (٥٨.٦%)ى به‌شداربووانى ئه‌م راپرسییه‌ ئه‌وه‌یان ئاشکه‌را کرد که‌ پاڵپشتى له‌ بڕیارى حکوومه‌تى کوردستان به‌ داخستنى مه‌یخانه‌کانى ناوچه‌کانى نا موسلمان نشین ناکه‌ن، ئه‌مه‌ش نیشانه‌ى ئه‌وه‌یه‌ که‌ بێزارییه‌کى بىَ ده‌نگ هه‌یه‌ به‌رامبه‌ر به‌ بڕیارى حکوومه‌تى کوردستان، که‌چى ئه‌نجامه‌کان گوڕان کاتێک پرسیاره‌که‌ هاته‌ سه‌ر رۆژوو خواردنى ئاشکه‌را، بۆیه‌ش (٧٢.٣%)ى به‌شداربووانى ئه‌م راپرسییه‌ ئه‌وه‌یان ئاشکه‌را کرد که‌ ئه‌وان پاڵپشتى له‌ بڕیارى حکوومه‌تى کوردستان ده‌که‌ن سه‌باره‌ت به‌ سزادانى ئه‌و که‌سانه‌ى که‌ بىَ رۆژوویى خۆیان له‌ شوێنه‌ گشتییه‌کان دا ئاشکه‌را ده‌ن، دیاره‌ ئه‌مه‌ش ئه‌وه‌ راده‌گه‌ێنیت که‌ شه‌قامى کوردستان له‌گه‌ڵ سه‌پاندنى کار و ئه‌رک رێوره‌سمه‌کانى موسلمانه‌کان نییه‌ به‌سه‌ر خه‌ڵکێکى نا موسلمان دا که‌ ئه‌وان به‌شێکن له‌ کۆمه‌ڵگاى کوردستان، به‌لآم له‌ هه‌مان کات دا شه‌قامى کوردستان رىَ نادات که‌سێک سوکایه‌تى به‌ ئه‌رک و رێوره‌سه‌کانى ئاینى زۆرینه‌ى خه‌ڵکى کوردستان بکات.

ئه‌نجامه‌کانى ئه‌م راپرسییه‌ ئه‌وه‌یان ئاشکه‌را کرد که‌ زۆرینه‌ى شه‌قامى کوردستان پێى وایه‌ که‌ موسلمانه‌کان تا رادده‌یه‌کى زۆر توندڕه‌ون له‌ به‌دیارخستنى رێوره‌سمى ئاینى خۆیان، بۆیه‌ش (٦١.٤%)ى به‌شداربووانى ئه‌م راپرسییه‌ پێیان وابوو که‌ ئه‌م توندڕه‌وییه‌ له‌ به‌دیارخستنى رێوڕه‌سمى ئاینى ئیسلام دا هه‌یه‌ به‌ تایبه‌تى له‌ ره‌مه‌زانان دا و سه‌پاندنى مه‌رجه‌کانى ره‌مه‌زان به‌سه‌ر نا موسلمانه‌کانیش دا، ئه‌مه‌ش نیشانه‌ى هه‌بوونى بێزارییه‌کى بىَ ده‌نگ هه‌یه‌ به‌ تایبه‌تیش له‌نێو گه‌نجه‌کان دا به‌رامبه‌ر به‌و هه‌موو مه‌رجه‌ توندڕه‌وانه‌ى ئه‌م مانگه‌ که‌ گوایه‌ مانگى دلۆڤانى و میهره‌بانى و خۆشه‌ویستییه‌!.

 

POiNT

www.pointnumber.com

رێکخراوى پۆینت بۆ راپرسى و لێکۆڵینه‌وه‌ ستراتیژییه‌کان

(p٠٠pss)

(NO. ٢٨)

ره‌مه‌زان... له‌ نێوان پابه‌ندبوون به‌ ئاسمان و رێزگرتن له‌وانه‌ى سه‌ر زه‌وین

(راپرسى)

(august – ٢٠١٢)

( ئەم پۆستە ئەلیکترۆنیە لەلایەن ئامێرئ سپامەوەیە. جاڤاسکریپت دەبێت چلاک بکەی بۆ بینینی, you need JavaScript enabled to view it ( (poopss٢٠٠٧@yahoo.com)

(٠٠٩٦٤) (٠٧٥٠٤٤٧٩٨٣٩) (٠٧٧٠١٦٢٩٨٨٨)

 

له‌ چاوه‌ی کامێڕاوه